Attività unika fost dawk li organizzajt mal-oħrajn kienet il-parteċipazzjoni tagħna f’Comicon, festival tal-cosplay, fejn kellna stand. Konna barra mill-kuntest mhux ħażin hemmhekk, imma n-nies interaġixxew magħna u riedu jkunu jafu aktar dwarna. Kienet esperjenza kemxejn stramba iżda bdejna nħossuna tajjeb ħafna!
Fil-futur irridu nagħmlu affarijiet bħal dawn fuq il-livell lokali għax nimmissjawha dik il-konnessjoni. Għalhekk, qed nimmiraw li noħorġu ’l barra minn Liżbona. Beħsiebna nżuru l-iskejjel u ninvolvu ruħna f’dibattiti. Inħossni pożittiv dwar dan kollu, peress li diġà nafu l-kuntest, lin-nies, u ma’ min se nitkellmu.
Fir-rigward ta’ dawk li qed jivvotaw għall-ewwel darba, ma nistgħux sempliċiment ngħidulhom jivvotaw; li nagħtuhom l-informazzjoni hija ħaġa tajba, iżda mhijiex biżżejjed. Il-motivazzjoni hija essenzjali. Jeħtieġ ngħidulhom affarijiet li jispirawhom, nuruhom kif il-votazzjoni tista’ taffettwa ħajjithom, x’bidliet tista’ ġġib magħha, u kif taffettwahom personalment. L-emozzjonijiet huma importanti, mhux biss li nagħtu l-informazzjoni. Il-vantaġġ tiegħi huwa li nista’ ninteraġixxi magħhom personalment, nifhem is-sentimenti tagħhom, u nħoss konnessjoni magħhom fuq livell aktar profond.
Barra minn hekk, din hija l-ewwel darba li se nivvota, esperjenza qawwija u personali li tagħmilha aktar faċli li noħolqu konnessjoni man-nies u li jħossuhom komdi magħna, u speċjalment dawk li wkoll se jivvotaw għall-ewwel darba.